साथ उपन्यासका पात्रहरूमा विसङ्गति र अस्तित्व

Abstract

प्रस्तुत लेख उपन्यासकार सरण राईद्वारा लिखित साथ उपन्यासका पात्रहरूमा विसङ्गति र अस्तित्वको  विश्लेषणमा केन्द्रित रहेको छ । साथ उपन्यास समाजका सीमान्तकृत वर्गलाई आधार मानी लेखिएको विसङ्गतिपूर्ण अस्तित्ववादी उपन्यास हो । नेपाली समाजमा सीमान्तकृत गरिएको वर्ग, समुदाय र पात्रहरूमा केकस्तो विसङ्गतिवादी चिन्तन र अस्तित्ववादी चेतना विकसित भएको छ भन्ने कुराको विश्लेषणमा यो लेख केन्द्रित रहेको छ । प्रस्तुत लेख तयारीका क्रममा प्राथमिक सामग्रीका रूपमा उपन्यासकार सरण राईको साथ उपन्यासलाई लिइएको छ भने द्वितीयक सामग्रीका रूपमा विसङ्गतिवादी र अस्तित्ववादी चिन्तनका बारेमा प्रकाश पारिएका सामग्रीहरूको उपयोग गरिएको छ । सामग्री विश्लेषणका क्रममा निगमनात्मक विधिअनुसार विसङ्गतिवाद र अस्तित्ववादको स्थापित सिद्धान्तका आधारमा व्याख्यात्मक तथा विश्लेषणात्मक विधिको प्रयोग गरी प्रस्तुत लेखलाई पूर्णता दिइएको छ । नेपाली समाजमा राज्यबाट किनारा लगाइएका, पछाडि पारिएका मान्छेहरूले जीवन भोगाइका क्रममा गरेका विसङ्गत अनुभव र उनीहरूले बाँच्नका लागि गरेको सङ्घर्षका आधारमा प्रस्तुत उपन्यास विसङ्गतिवादी अस्तित्ववादी चिन्तनमा आधारित उपन्यास हो भन्ने निष्कर्ष प्रस्तुत लेखको विश्लेषणबाट निकालिएको छ ।