लिच्छविकालीन लंखोयाःया निरन्तरता लुभुया लःफोनेगु

Abstract

लः जीवनय् मदय्क मगाः । जीवन न्ह्याकेत माःगु अन्नया नितिं नं लः हे माः । अथे खःसां प्राकृतिक रुपं वय्माःगु वा वइमखु । थुकिं यानाः छगूकथं जनजीवन हे अस्तव्यस्त जुजुं वनी । थुजोगु विकल्पहीन अवस्थाय् धार्मिक मूल्य मान्यताकथं द्योया आराधना पूजायात थाय् बी । नेपाःगालय् थुजोगु अवस्थाय् नेपाःगाः न्यंकर भुनाचोंगु गुँचोकाय् वनाः लः फों वनी । थथे लः फों वन कि वा वइ धाइ । थ्व पूर्व मध्यकालनिसेंया निरन्तरता खः । नेसं ४९७ य् हे नेपाः गालय् वा मवःगु इलय् खनेदुगु लः फोनेगु पद्धति थौंतकं ल्यंदनि । वा मवयाः समस्या जुल धाःसा थीथी गुँचोकाय् वनाः लः फोंवनी । उकीसनं लुभुया बीभुँती (विहेबर) लागाय् वनाः लः फोंवनी । थन वनाः लः फोंवनधाःसा वा वइ धइगु दु ।