मर्माहत मुद्रा कथामा डायस्पोरा

Abstract

मर्माहत मुद्रा कथाका लेखक राजव हुन् । उनले यस कथामा प्रवासमा रहेका नेपालीहरूले भोगेको जीवनलाई प्रस्तुत गरेका छन् । यस कथामा आप्रवासी वा डायस्पोराहरूले कस्तो जीवन बिताइरहेका छन् भन्ने देखाइएको छ । यस अध्ययनको उद्देश्य राजवद्वारा लिखित मर्माहत मुद्रा कथामा डायस्पोरा नेपालीहरूको चित्र के कस्तो रूपमा प्रस्तुत भएको छ देखाउनु रहेको छ । यस उद्देश्यलाई पुरा गर्न डायस्पोरिक अध्ययन सिद्धान्तको मर्म अनुरूपको निगमनात्मक विधिको प्रयोग गरिएको छ । प्रस्तुत अध्ययनमा डायस्पोराहरूको मानसिकतालाई अतीत मोह, मूलथलो र इच्छित भूमि, संस्कृति प्रतिको मोह, मिश्रित भाषिक स्थिति तथा एकाकीपनका आधारमा विश्लेषण गरिएको छ । यस कथामा प्रयुक्त उल्लिखित आधारहरूका आधारमा डायस्पोरिक मानसिकतालाई प्रस्तुत गरिएको छ । प्रस्तुत कथामा डायस्पोराहरूले मूलथलोप्रतिको मोह प्रस्तुत गरेका छन् । त्यसैले मर्माहत मुद्रा कथा डायस्पोरिक कथा हो र यसका कथाकार राजव डायस्पोरिक कथाकार हुन् ।