प्रिया ! मुक्तकसङ्ग्रहमा समसामयिक यथार्थता

Abstract

प्रस्तुत लेखमा समसामयिक यथार्थताका दृष्टिले प्रिया ! मुक्तकसङ्ग्रहको विश्लेषण गरिएको छ । प्रिया ! मुक्तकसङ्ग्रहमा समसामयिक यथार्थताको अभिव्यक्ति के कस्तो रहेको छ भन्ने प्राज्ञिक जिज्ञासाको समाधान गर्ने उद्देश्य यस अध्ययनमा राखिएको छ । बहुसत्यमा विश्वास गरिएको यस अध्ययनमा गुणात्मक अनुुसन्धान ढाँचाको उपयोग गरिएको छ । शोधदर्शनका बिचमा समन्वय कायम गरिएको यस अध्ययनमा पाठको व्याख्यावादी अध्ययनपद्धतिको अवलम्बन गरिएको छ । अध्ययनका क्रममा आवश्यक प्राथमिक र द्वितीयक स्रोतका सामग्रीहरु पुस्तकालयबाट सङ्कलन गरिएको छ । समसामयिक यथार्थताको अवधारणाका आधारमा निर्मित उपकरणहरु देशभित्रका बेथिति, पुँजीवादको प्रभाव, विदेशी भूमिप्रतिको आकर्षण र सम्बन्धगत विखण्डनका आधारमा निर्धारित मुक्तकसङ्ग्रहको विश्लेषण गरिएको छ । वर्तमान नेपाली समाजमा बेथिति बढ्दै गएको, पँुजीवादको प्रभावका कारण मानिसमा स्वार्थी र व्यक्तिवादी प्रवृत्ति बढ्दै गएको, विदेशी भूमिप्रति आकर्षित हुने प्रवृत्ति व्यापक रहेको एवम् पारिवारिक सम्बन्ध विखण्डित बनेको यथार्थता यस मुक्तक सङ्ग्रहमा अभिव्यक्त भएको छ भन्ने निष्कर्ष यस अध्ययनको रहेको छ । वर्तमानमा नेपाली समाजमा देखिएका यस्ता समस्या देशका लागि घातक रहेका छन् भन्ने व्यञ्जनायुक्त अर्थ यस सङ्ग्रहका मुक्तकले सम्प्रेषण गरेका छन् भन्ने निष्कर्षात्मक प्राप्ति यस अध्ययनको रहेको छ ।